ନିଜ ଅଂଚଳର ସଡ଼କକୁ ହେମା ମାଳିନୀଙ୍କ ଗାଲ ସହ ତୁଳନା କରି ଅଡୁଆରେ ମନ୍ତ୍ରୀ

0 28

ମୁମ୍ୱାଇ: ମହାରାଷ୍ଟ୍ର ମନ୍ତ୍ରୀ ତଥା ବରିଷ୍ଠ ଶିବସେନା ନେତା ଗୁଲାବରାଓ ପାଟିଲ ବିବାଦରେ । ନିଜ ଜିଲ୍ଲା ତଥା ବିଧାନସଭା ନିର୍ବାଚନମଣ୍ଡଳୀର ରାସ୍ତାକୁ ଅଭିନେତ୍ରୀ ହେମା ମାଳିନୀଙ୍କ ଗାଲ ସହ ତୁଳନା କରି ବିବାଦରେ ଫସିଛନ୍ତି। ତେବେ ଏହାକୁ ନେଇ ରାଜ୍ୟ ମହିଳା ଆୟୋଗ କଡ଼ା ଆଭିମୁଖ୍ୟ ଗ୍ରହଣ କରିବା ପରେ ମନ୍ତ୍ରୀ ତାଙ୍କ ବିବୃତ୍ତି ପାଇଁ କ୍ଷମା ପ୍ରାର୍ଥନା କରିଛନ୍ତି।

ଆୟୋଗର ଚେତାବନୀର କିଛି ଘଣ୍ଟା ପରେ ପାଟିଲ ତାଙ୍କ ବିବୃତ୍ତି ପାଇଁ କ୍ଷମା ପ୍ରାର୍ଥନା କରିଛନ୍ତି। ଧୁଲରେ ସାମ୍ବାଦିକମାନଙ୍କୁ ପାଟିଲ କହିଛନ୍ତି ଯେ ମୋର ଉଦ୍ଦେଶ୍ୟ କାହାକୁ ଆଘାତ ଦେବା ନୁହେଁ। ମୋର ମନ୍ତବ୍ୟ ପାଇଁ ମୁଁ କ୍ଷମା ମାଗୁଛି। ପାଟିଲଙ୍କ ମନ୍ତବ୍ୟର ଭିଡିଓ ସୋଶାଲ ମିଡିଆରେ ଭାଇରାଲ ହୋଇଛି। ନିକଟରେ ଜିଲ୍ଲାରେ ବୈଦ୍ଧ ନାଗର ପଞ୍ଚାୟତ ନିର୍ବାଚନ ସମୟରେ ଏକ ବୈଠକକୁ ସମ୍ବୋଧିତ କରିବାବେଳେ ମନ୍ତ୍ରୀ ଏହି ମନ୍ତବ୍ୟ ଦେଇଛନ୍ତି।

ତାଙ୍କ ଅଭିଭାଷଣରେ ପାଟିଲ ତାଙ୍କ ବିରୋଧୀଙ୍କୁ ବିଧାନସଭା ନିର୍ବାଚନମଣ୍ଡଳୀ ପରିଦର୍ଶନ କରିବାକୁ ଏବଂ ସେଠାରେ ଭଲ ଗୁଣାତ୍ମକ ରାସ୍ତା ଦେଖିବାକୁ କହିଥିଲେ। ବହୁ ବର୍ଷ ଧରି ଜାଲଗାଓଁ ଆସନରୁ ବିଧାୟକ ଥିବା ପୂର୍ବତନ ବିଜେପି ନେତା ଏକନାଥ ଖଡଗେଙ୍କ ଉପରେ ବର୍ଷିବାକୁ ଯାଇ ରାଜ୍ୟ ଜଳ ଯୋଗାଣ ମନ୍ତ୍ରୀ ପାଟିଲ କହିଛନ୍ତି ଯେ ଯେଉଁମାନେ 30 ବର୍ଷ ଧରି ବିଧାୟକ ଥିଲେ ସେମାନେ ମୋ ବିଧାନସଭା ନିର୍ବାଚନମଣ୍ଡଳୀକୁ ଆସି ରାସ୍ତା ଦେଖିବା ଉଚିତ୍। ” ଯଦି ଏହି ରାସ୍ତା ହେମା ମାଳିନିଙ୍କ ଗାଲ ପରି ନହେବ ତାହେଲେ ମୁଁ ଇସ୍ତଫା ଦେବି।

ଏହାପରେ ରାଜ୍ୟ ମହିଳା ଆୟୋଗର ଅଧ୍ୟକ୍ଷ ରୁପାଲି ଚକ୍କର ମନ୍ତ୍ରୀ ପାଟିଲଙ୍କ ମନ୍ତବ୍ୟକୁ ନେଇ ମନ୍ତବ୍ୟ ରଖିଥିଲେ ଏବଂ କ୍ଷମା ନମାଗିଲେ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦେଇଥିଲେ।

Leave A Reply

Your email address will not be published.